Dr Ursprung vor Demokratie

Politischi gschicht isch di einzig empirischi grundlag wo mir hei, wenns drum geit politik zbeurteile. Es isch eifach devo zrede, dass me vo de moral vo üsem jahrhundert, de « lessons of history » söt lerne. E wärtvorstellig, ohni ambition se uszfüre, isch aber sinnlos. Für vili bedütet das nämlech nid, vo de gschicht zlerne, sondern eifach ohni se dür s'läbe z'irre.

Hesch du gwüsst, dass demokratie eigentlech e ganz anderi bedütig het gha füre Aristoteles als für üs hüt, ir modärne zit? Ig meine würklech ganz anderi institutione, ganz anderi prinzip, usw. Und ig meine nid "zur zit vom Aristoteles hets sklaverei gä". Vor 200 Jahr het me in Amerika und ville andere orte sklaverei und was me unger demokratie verstande het au kompatibel gfunde, genauso wies erst vor churzem politischi frauerächt git.

Hesch du gwüsst, dass die institution wo mit dr demokratie assoziiert isch worde gar nid i hütige staate existiert?

Zuefallsverfahre!

I däm kontext, wie chame vertraue ha i üsi kulturelle mythe? Wie? Ob vo irgendeme exzentrische profässor oder eme kolleg, wo dir wot erkläre wie drogepolitik funktioniert, oder prostitution, oder äbe was demokratie bedütet…

…wie chame da eifach zuelose und vertraue ha, dass mir üs nid gägesitig märli verzelle? Het irgendöpper überhaupt t‘gschicht vo portugiesischer drogepolitik, schwedischer prostitution oder vo prostitution und em französische Empire gläse? (Und was bedütet „gschicht“ läse?)

Hesch du gwüsst, dass per definition demokratie het bedütet: di ärmste regiere? Dr Aristoteles erklärt: sogar wenn di riche t‘mehrheit si, isches erst e demokratie, wenn di arme regiere, süscht isches e oligarchie. (Zitat: ...) Sogar e Sächstklässler versteit das!

Hesch du das jehmals irgendwo glernt? Oder hesch vilicht gmeint, dass mes dir scho wird säge, wenns wichtig wär?

Propaganda isch t’norm, au wenn si nid 100% falsch isch. Si isch irreführend.

Athen ir antike isch es anthropologischs bispil vore gmeinschaft, wo e politischi organisation entwicklet het, so wie t'Inkas, so wie irgend en anders antiks volk. Eifach, dasses dört "demokratia" het gheisse und das drufabe e zimlechi ufruer het gä. Wie bi vilne sache weiss me hüt vil meh über Athen als im 18. Jh., eifach, dass me kulturell mit mythe het gläbt über was demokratie oder republik (res publica, vo de römer) bedütet. Nume hei die mythe üses ganze politische system beiflusst und mir läbe immerno mit mythe und propaganda (im effektivste sinn: politiker wo üsi stimm bechöme, well si zu dene mythe stöh).

Säg mir doch: vo wo chöme üsi vorstellige vor demokratie genau?

Und was isch t‘realität vo all dene wörter wo mir vom altgriechische übernäme, wie politik, demokratie, oligarchie, monarchie, aristokratie, timokratie, plutokratie, tyrannei, usw.?